சிவன் பாமாலை - வானனை, மதி சூடிய - Vaananai Mathi Soodiya

வானனை, மதி சூடிய - Vaananai Mathi Soodiya

ஐந்தாம் : திருமுறை 

அ௫ளியவர் :  திருநாவுக்கரசர்

பண் : திருக்குறுந்தொகை

நாடு : நடுநாடு தலம் :  அண்ணாமலை

--------------

வானனை, மதி சூடிய மைந்தனை,

தேனனை, திரு அண்ணாமலையனை,

ஏனனை, இகழ்ந்தார் புரம்மூன்று எய்த

ஆனனை, அடியேன் மறந்து உய்வனோ?

 

வீரனை, விடம் உண்டனை, விண்ணவர

தீரனை, திரு அண்ணாமலையனை, 

ஊரனை, உணரார் புரம் மூன்று எய்த 

ஆரனை, அடியேன் மறந்து உய்வனோ?

 

வட்டனை(ம்), மதிசூடியை, வானவர்- 

சட்டனை, திரு அண்ணாமலையனை, 

இட்டனை, இகழ்ந்தார் புரம்மூன்றையும் 

அட்டனை, அடியேன் மறந்து உய்வனோ?

 

மத்தனை(ம்), மதயானை உரித்த எம் 

சித்தனை, திரு அண்ணாமலையனை, 

முத்தனை(ம்), முனிந்தார் புரம்மூன்று எய்த

அத்தனை, அடியேன் மறந்து உய்வனோ?

 

 காற்றனை, கலக்கும் வினை போய் அறத் 

தேற்றனை, திரு அண்ணாமலையனை, 

கூற்றனை, கொடியார் புரம்மூன்று எய்த 

ஆற்றனை, அடியேன் மறந்து உய்வனோ?

 

மின்னனை, வினை தீர்த்து எனை ஆட்கொண்ட 

தென்னனை, திரு அண்ணாமலையனை, 

என்னனை, இகழ்ந்தார் புரம்மூன்று எய்த 

அன்னனை, அடியேன் மறந்து உய்வனோ?

 

மன்றனை(ம்), மதியாதவன் வேள்விமேல் 

சென்றனை, திரு அண்ணாமலையனை, 

வென்றனை, வெகுண்டார் புரம்மூன்றையும் 

கொன்றனை, கொடியேன் மறந்து உய்வனோ?

 

கருவினை, கடல்வாய் விடம் உண்ட எம் 

திருவினை, திரு அண்ணாமலையனை, 

உருவினை, உணரார் புரம் மூன்று எய்த 

அருவினை, அடியேன் மறந்து உய்வனோ?

 

அருத்தனை, அரவு ஐந்தலை நாகத்தைத் 

திருத்தனை, திரு அண்ணாமலையனை, 

கருத்தனை, கடியார் புரம்மூன்று எய்த 

வருத்தனை, அடியேன் மறந்து உய்வனோ?

 

அரக்கனை அலற(வ்) விரல் ஊன்றிய 

திருத்தனை, திரு அண்ணாமலையனை, 

இரக்கம் ஆய் என் உடல் உறு நோய்களைத் 

துரக்கனை, தொண்டனேன் மறந்து உய்வனோ?